கட்டளை கலிப்பா - முருகன்

#கட்டளை_கலிப்பா

மா கூவிளம் கூவிளம் கூவிளம்.. (2)

வாராய் என்றடி போற்றுவார் தம்மெதிர்

~ வருமென் வேலனே கந்தனே நல்லருள்

தாராய் என்றுனை வேண்டுவார் கேட்டதை

~ தருமென் பாணியே குன்றெலாம் நின்றவா

பாராய் என்றுனை பாடுவோர் தம்தமிழ் 

~ பாவாய் வந்துறை சுப்பனே ஒப்பிலா

வீரா போர்களம் தூள்பட புக்கெதிர்

~ வீழ்த்தும் வேந்தனே ஞானமே வீரனே... 

நீரில் தோன்றிய பாலகா ஏரகா

~ நீந்தும் மஞ்ஞையில் ஏறிய சண்முகா

போரில் குன்றையே ரெண்டென துண்டிய

~ பெருவேல் கொண்டவா வேடவா வேலவா

நேரில் வந்தெனை நேர்பட செய்தருள்

~ நெய்தல் நாயகா மாயவன் நாதனே

பாரில் காவலாய் வந்தயெம் காவலா

~ பாடி போற்றினேன் பாவங்கள் போகவே.. 

காற்றின் கையிலே கங்காய் வந்தொரு

~ காய்தழல் கையிலே காய்சுடர் ஆகவே

ஆற்றில் சிந்திய ஆறுதீ அங்கொரு

~ ஆறாய் தோன்றிய அற்புதன் நீயென

போற்றி பாடவோ பாவினில் ஆடவோ

~ பொய்யர் சேனையும் ஓயுமோர் வேலனை

ஏற்றிப் பாடவோ ஏகனின் சித்தியை

~ஏது பாடவோ சொல்லடா கந்தனே.. 

#இலக்கணம்  மேற்கண்ட வாய்பாட்டில் அமைந்தால்.. 

முதல்சீர் நேரசையில் தொடங்க அரையடிக்கு  11 எழுத்து

நிரையில் தொடங்க 12 எழுத்து.. 

மா கூவிளம் கூவிளம் கூவிளம் என்பது அரையடி..