அடியவர் தொழவே அருளிடும் முருகா அருகில் வாராயோ
பொடிபடு உடலை புனிதமும் பெறவே புதுமை தாராயோ
வடிவதில் சுடராய் வருதுயர் தவிர்ப்பாய்
வறுமை தீராயோ
நொடிபொழு ததிலே நெடிதுயர் கிரியை
பிளந்த வேலோனே.. 1
கடியவை விரும்பும் கடம்பனே உனது கரமே தாராயோ
பொடிநடை யெனவே பதமது அடைந்து
பணிவார் பாராயோ
அடியமர் யரவாய் அலைந்திடும் மனத்தை அடக்கி ஆளாயோ
பொடியுடல் முழுதும் படும்பசு பதியார் இளைமக வானோனே. 2
தடியுடை கிழவா தமிழதன் தலைவா திணைத்தேன் உண்ணாயோ
துடியுடை எழிலாள் தமிழ்மகள் குறத்தி துணையாய் நிற்போனே
படிமுறை எனவே பகுவினை முனிவர் புகழும் செவ்வேளே
விடிகதிர் அனைய வடிவினை உடைய
வனைமக வானோனே 3
குடியுயர் வதற்கே குலமுயர் வதற்கே குறிசெய் கோனோனே.
முடியுயர் முனிவர் மனமுடி யமர்ந்து மதிசெய் ஞானோனே.
இடியென இறங்கி இருடிகள் படைதான் இலதாய் செய்வோனே
பிடிதுணை முகத்தன் பிரியமுள் குமரா தனிவேல் கொண்டோனே. 4
அடிதொழு மமரர்க் கடுசமர் தொடுத்து
அவுணர் கூறாக
வெடிபடு சுடராய் வெடித்துடன் அவரை அழித்த வாகையே
முடியென அணிந்த முகைமலர் முகத்தால் முருகாய் தோன்றிங்கு
நொடிமிசை வரங்கள் நலமொடு வழங்கும் பழனிச் சேயோனே 5
துடியிடை உடைய தளிர்முகத் தழகை உடைய வேலோனே
பிடிமகள் கரத்தை பரங்கிரி அதனில்
பிடித்த தேசாகி
நடிப்பொடு இசைக்கும் நடத்தமிழ் தனக்கும் மயங்கும் வேலோனே
படிப்பவர் துதிக்கும் பரத்திரு குமரா குகனே ஈசோனே.. 6
நொடிக்குளே துடிப்பாய் நெருப்பென விளங்காய் விரிந்த பேராற்றல்
கொடியதி லுருவாய் குடிபுகு சவலை அடையாய் கொண்டாயே
மடிமுதல் துணையாய் மதிதர வெனவே மனதில் நின்றாயே
அடிமுதல் முடியாய் அதிபரஞ் சுடராய் விளங்கி நின்றோனே. 7
முடிவதில் துணையாய் மொழியருள் முனிய னெனவே வாராயோ
குடியதில் குகனாய் குறஞ்சியில் திளைத்த குமரக் கோவாகி
துடிக்கிற உயிரை துவதசம் கடத்தி துதிசெய் பேறான
முடியதில் நிறுத்தும் முடிமதன் தலைவா முருகா நீபோதும் 8
அடிக்கிற புயலில் அலைகிற துகளாய் அலைந்து ஓயாது
துடிக்கிற மனதை தடுத்திடை நிறுத்தி தகையாம் போதங்கள்
படிக்கிற நிலையில் படுத்திட வரணும் பரமன் சேயோனே
நடிக்கிற நிகழ்ச்சி நிகழ்வது முடியும் நொடிக்கு நீபோதும். 9
வடிக்கிற விழிகள் வருந்துதல் மறக்க விரைந்து நீவாராய்
செடியதன் உடலாய் செழித்திட இருக்கும் செயலை நீதாராய்
முடிவதில் முழுதும் முடிந்தினிப் பிறவா முறையை நீதாராய்
தடியுடைக் குமரா தனித்துணை யிறைவா நிறைவாய் நீபோதும்.. 10
إرسال تعليق