சண்முக சட்கண்டம் - 2 நிலையுணர் பதிகம்

 மாகமென மோகமதில் நானலையும்

 ~ மார்க்கமதை வைத்ததென்ன காரணமோ

தாகமென பூவுலகில் நானிழிய 

~ தானெனவே ஆணவத்தே வைத்ததென்ன?.

பூகமழும் வாசமென சில்நாள்தான்

~ பூமியினில் நானிருக்க காவாதே

யாகமென்றும் பூசையென்றும் போனதென்ன

~ யான்வணங்கும் பாதமுடை பேரிறையே.. 1

வாழுகிற நாளிலெல்லாம் வாழாது

~வாடுகிற நெஞ்சமதை வீடெனவே

வாழுகிற நாதனவன் வாராது

~வாடுகிற என்னுயிரை காவாது

வீழுகிற நாளதிலும் வாராது

~ வேறுதிசை மேவியவன் போனதெங்கே

பாழுமிந்த பாவியென்றன் பாசமதை

~ பாராது ஊர்மேவ போனதெங்கே..2

யாரெனத்தான் நானறியேன் எங்கெங்கும்

~ யாமிருப்பேன் என்றுரைத்த ஏதிலியை

யாரெனத்தான் தேடிடுவேன் ஓதுமறை

~யாவிலுமே தேடிடுதல் ஆகாத

பேரெனத்தான் எவ்விதத்தில் தேடிடுவேன்

~பேச்சுடையோர் தாமறியா ஞானமதை

ஊரெனத்தான் ஊடிநின்ற ஒன்றினைநான்

~ உள்ளொளியை ஏற்றாது தேடுவனோ?. 3

வாரணத்தார் என்பதுவோ வரிசிலையில்

~ வீற்றிருக்கும் ஆற்றலதோ புரியலையே

காரணத்தால் காண்பதுவோ கிரிமிசையில்

~ காவலுடை தீரனதோ அதுவிலவே

சீரணத்தால் உள்ளுவதோ சிரமதனில்

~சித்தமென உள்ளதுவோ விடையிலையே

பூரணத்துள் பூரணமாம் பிரிவிலாத

~ பூரணமும் அல்லதுவும் எனவினவ 4

கொண்டதொரு கேள்வியதால் பகுத்தறிந்து

~கோலமுடை கோலனவன் மாயமதை

கண்டதொரு ஊழ்வழியே பிரித்துணர்ந்து

~காணாத காலமதில் கலந்தகதை

அண்டமென பிண்டமென விரிந்ததென

~அன்றொருநாள் கற்றபின்னே அவனருளால்

உண்டதென உள்ளுணர்ந்து உறவறிந்து

~ ஊடியுள்ள உள்பொருளை உணருகவே 5

உணருகவே உணருகவே உணர்வழிய

~உணருகவே உமிலிருப்ப துணருகவே

குணம்பெரிய பொருளதனை குறைவதின்றி

~குழைந்துமன முருகுகவே உலகமாகு

கணம்பொருத்த பொருளதனை உணருகவே

ரணம்மறுத்து நலமருளும் நமதுசொந்த

~ ரசனையாகி வளருமதை உணருகவே. 6

சொந்தமென்று வந்தவொன்றை கூடியிந்த

~சொப்பனத்தில் நிர்மலமாய் ஆடிடவே

பந்தமொன்றை வைத்துமற்ற பந்தமதை

~பற்றுவிட பற்றிநீரும் சுட்டிடவே

விந்தமாகி வித்தகமாய் வேடிக்கை

~வைத்ததொரு வித்துயெனக் கண்டவுடன்

சிந்தனையுள் சித்தமாகி சுத்தமான

~சித்தமதை பெற்றவர்தான் கோடியாமே.. 7

அந்தவழி போகவென்று அற்புதத்தின்

~ ஆதிகண்டு அன்புமிக வாகிநின்று

மந்தமதி நீங்கவென்று சங்கடங்கள்

~ மங்குவகை யாகுமென்று எண்ணமெழ

முந்துவினை தீரவென்று முத்திபெற

~மும்மைதீர மூலவினை முற்றலாக

விந்துமனம் விந்துயென வேகமுற

~வந்தயிறை எவ்வழியே போனதுவோ. 8

மங்கையரின் மார்பதனில் கார்முகிலாய்

~ மோகமெழ காமமதில் வீழ்வதுவோ

கங்கையதில் மூழ்கிவந்து காலமெலாம் 

~ கண்டபடி வாழ்வினிலே ஓடுவதோ

செங்கமல பெண்ணெதிரே வைத்திட்டு

~சிற்றிடையில் சிக்கிடவோ திக்கிடவோ

எங்கிருந்தோ இவ்வகையில் ஆட்டிவிட்டால்

~என்மனமும் ஆடுவதோ பராபரமே. 9

செர்க்கமென நகரமென செத்துவினை

~ சேரவரும் பிறவியெலாம் வேண்டிலனே

தர்க்கமொடு உரைபடுத்தி வாதிடவும்

~தேற்றமின்றி சிறுமதியால் தேங்கிடவே

வர்க்கமதில் படைத்துவிட்டு விட்டதென்ன 

~ வீடதனை வந்திறங்கி ஈவதின்றி 

சர்க்கரத்தை சுற்றியதாய் சுற்றவைத்த

~சூட்சுமத்தின் மர்மமென்ன பேரிறையே.. 10