அரணவன் மகனே அரிதிரு மருகா ஆரி ராராரோ
சரவண பவனே சிரகிரி முருகா ஆரி ராராரோ
அரவணைப் பதற்கே அலைமகள் வருவாள் ஆரி ராராரோ
அரவமும் மதியும் அணிந்தவர் குமரா தாலே தாலாலோ. 1
இரவியும் மதியும் இருபதம் பணிவார் ஆரி ராராரோ
புரவியை செலுத்தும் புரந்தரன் மருகா ஆரி ராராரோ
சிரங்குவி முனிவர் சிறந்துனைப் புகழ்வார் ஆரி ராராரோ
வரம்பல கொடுத்தே மலர்கரம் சிவந்தாய் தாலே தாலேலோ 2
அரகர சிவனார் அருட்புனல் செரிந்தாய் ஆரி ராராரோ
தரணியில் குடிகள் தழைத்திட விழைந்தாய் தாலே தாலேலோ
விரதமும் புரிந்தே விரிகடல் கடந்தாய் வேலா தூங்காயோ.
பரங்கிரி முதலாய் பனிவளை மணஞ்செய் பாலா தாலேலோ. 3
கரமது சிவந்து கலங்கிட வரஞ்செய் கந்தா தூங்காயோ.
தரமுடை மனிதர் தனித்துணை புரிவோர் தேசா தூங்காயோ
அரவணத் துனையே அருகினில் கிடத்த அன்பே தூங்காயோ
பரமனின் புதல்வா பருவதன் முருகா பொன்னே தாலேலோ.. 4
மரமதை இரண்டாய் மயிலெனப் பிளந்தாய் மானே தூங்காயோ
புரவலர் புனையும் புதுமொழி தனிலேப் பாடத் தூங்காயோ.
குரம்பருள் குகனே குறமகள் கணவா கந்தா தூங்காயோ
வரகவி புனைவை விரும்பிடும் கவிஞா வேளே தாலேலோ. 5
சிரமதில் நதியை சுமந்தவன் குமரா சேயோய் தூங்காயோ
அரக்கரின் படையை அழித்திட பிறந்தோய் ஆறோய் தூங்காயோ
சரவணக் குளத்தில் சிதறலாய் விழுந்த தேசோய் தூங்காயோ
உரமென அடியார் உளமதில் விளையும் ஊற்றே தாலேலோ. 6
சரணமே தருகிற சகத்தவர் அடியார் சீலா தூங்காயோ
பரணிகள் புகழும் படையழித் தவனே பாகாய் தாலேலோ
புரவிகள் பரவும் படைகளத் ததிலே பூவாய் தோன்றாங்கே
இரவிகள் நெகிழ இருடிகள் எரிசெய் வெய்யோய் தாலேலோ 7
கரமிடு பவர்க்கே கரங்கொடுப் பவனே காவோய் தூங்காயோ
விரலினை பிடித்தே வருங்குக அழகா வேலா தூங்காயோ
சுரபிகள் சுரக்கும் சிரந்தரு அமுதை செய்வோய் தூங்காயோ
மரபினில் முதியா முழுயிளங் குமரா மாறா தாலேலோ 8
புரமதை எரித்த புதிரவன் புதல்வா பூவே தூங்காயோ
குரம்பினை தரித்த குடிகளை உயர்த்தும் கண்ணே தூங்காயோ
வரம்பினை கடந்தே வரும்வினை அறிந்தோர் வேந்தா தூங்காயோ
இரந்திடும் எனது இதயமே உனதே ஈசா தாலேலோ 9
துரத்திடும் துயரை துரத்திடும் துணையே தேனே தூங்காயோ
சரணமே சரணம் சரணமே சரணம் சாமி ஆரீரோ
அரணென வருவோய் அருமருந் தமுதோய் ஆரோ ஆரீரோ
சரணமே சரணம் சரவணா சரணம் செந்தில் தாலேலோ.. 10
Post a Comment