பொறாமை கொள்ளாமை சமூகத்தின் தீதில்லா இயக்கத்திற்கும் இல்லறத்தின் ஆதார இயக்கத்திற்கும் அவசியமாவதை விளக்குகிறார் பேராசான்.
161. ஒழுக்காறாக் கொள்க ஒருவன்தன் நெஞ்சத்
தழுக்கா றிலாத இயல்பு.
உரை: மனதில் பொறாமை இல்லாத இயல்பினால் ஒருவன் தன் ஒழுக்கத்தை படிப்படியாக கொள்ளலாம்
162. விழுப்பேற்றின் அஃதொப்ப தில்லையார் மாட்டும்
அழுக்காற்றின் அன்மை பெறின்
உரை: யார் மீதும் பொறாமை கொள்ளாத நிலை போல உயர்ந்தபேறு தருவது ஏதுமில்லை.
163. அறனாக்கம் வேண்டாதான் என்பான் பிறனாக்கம்
பேணா தழுக்கறுப் பான்.
உரை : அறவழி வரும் நன்மையை அறியாதவன் தான் பிறர் மீது பொறாமை கொள்வான்
164. அழுக்காற்றின் அல்லவை செய்யார் இழுக்காற்றின்
ஏதம் படுபாக் கறிந்து.
உரை : பொறாமையால் வரும் துன்பம் அறிந்த அறிவுடையோர் பொறாமையால் தீயவை செய்ய மாட்டார் .
165. அழுக்கா றுடையார்க் கதுசாலும் ஒன்னார்
வழுக்கியுங் கேடீன் பது.
உரை: பொறாமை இருக்கும் போது பகைவர் என ஒருவர் தனியே தேவையில்லை
166. கொடுப்ப தழுக்கறுப்பான் சுற்றம் உடுப்பதூஉம்
உண்பதூஉ மின்றிக் கெடும்.
உரை: பிறர் கொடுப்பதை கண்டு பொறாமை கொள்வான் உறவுகள் உண்பதுவும் உடுப்பதுவும் இல்லாமல் அழியும்.
167. அவ்வித் தழுக்கா றுடையானைச் செய்யவள்
தவ்வையைக் காட்டி விடும்.
உரை: பிறரை கண்டு பொறாமை கொள்பவள் இல்லத்தில் திருமகளாகிய செல்வம் கூட மூதேவியை காட்டி விடும்.
168. அழுக்கா றெனவொரு பாவி திருச்செற்றுத்
தீயுழி உய்த்து விடும்.
உரை : பொறாமை என்கிற பாவி ஒருவனை குறுக்கு வழி எனக்காட்டி தீய வழியில் தள்ளி அவன் செல்வத்தை அழித்துவிடும்.
169. அவ்விய நெஞ்சத்தான் ஆக்கமும் செவ்வியான்
கேடும் நினைக்கப் படும்.
உரை: பொறாமை கொண்டவனின் முன்னேற்றமும் . குறையில்லா நல்லவன் கேடும் எப்போதும் நினைக்கப் படும். காரணம் அவையிரண்டும் நடவா அதிசயங்கள் நடந்தது என்பதால் .
170. அழுக்கற் றகன்றாரும் இல்லையஃ தில்லார்
பெருக்கத்தில் தீர்ந்தாரு மில்.
உரை: பொறாமை இல்லாமல் அழிந்தாரும் இல்லை . பொறாமையால் வாழ்ந்தவரும் இல்லை.
சினிமாக்கு எல்லாம் பல நூற்றாண்டுக்கு முன்னாடியே வள்ளுவர் பஞ்ச் டையலாக் எழுதிருக்காரு போல.
Post a Comment